【本報訊】美少女以為彩光脫毛可以一勞永逸，卻因此換來長腿上永久疤痕！ Carol本月初到纖之美醫學美療中心，進行小腿彩光脫毛，豈料「一脫毛成千古恨」，右腳小腿事後出現二十多條火車軌狀的紅印，經診斷證實小腿被燒傷，傷痕永久不消除。美容中心竟以「我哋有我哋嘅專業，唔接受醫生診斷」，美少女已向警方報案和向消委會投訴，並準備民事追訴。

在友人介紹下， Carol於7月8日，到纖之美醫學美療中心位於尖沙嘴金馬倫道分店，進行小腿彩光脫毛。她憶述，療程由一名十分年輕的女職員進行，「佢喺我小腿搽啲啫喱，跟住等咗一陣，就用部彩光機照我啲皮膚。」事後職員用濕紙巾抹走啫喱，然後着她「搽返啲蘆薈保濕就 ok」，毋須其他特別護理。

美容中心不認同醫生診斷

「做完彩光，已即時覺得右小腿痕痕哋。兩日後，我喺屋企着住短褲坐嘅時候，爸媽望住我隻腳，好驚咁話：『阿囡，你隻右腳做咩腫晒紅晒？』真係嚇死我！」 Carol向記者展示當晚發現小腿紅腫的相片，相片中可見 Carol的右邊小腿出現至少二十多條火車軌狀的紅印。
翌日早上， Carol發現這些紅印上出現許多小水泡，她立即致電通知美容中心，但職員表示「經理唔喺度，下午你再嚟畀我睇吓」，但為防情況惡化，她決定先向皮膚科醫生求診，「醫生一睇就話好明顯係燒傷，仲話啲疤痕隨時跟住我一世，我隻腳以後點見人啊！」
同日下午， Carol攜同醫生紙到美容中心，「我淨係想退錢（三千多元），唔敢再做（彩光）啦！」但中心總經理 CoCo看過其傷勢後，斬釘截鐵表示「你係皮膚乾燥，唔關彩光事」，更不認同醫生診斷，「醫生有醫生嘅專業，我哋有我哋嘅專業，我哋唔接受醫生嘅診斷」，拒絕退款賠償。

「唔敢着短裙 成日痛醒」

Carol向警方和消委會求助，「話我皮膚乾燥，又唔見我左腳有事？」本報記者曾親自到中心和致電查詢，惟至今仍未獲回覆。警方則表示正跟進事件，消委會已着手調查投訴。
消委會發言人指出，在本港使用彩光或激光等醫學美容儀器，毋須申領專業牌照，不過有關公司有責任培訓操作儀器人員，確保使用過程的安全。消委會由08年至今，共接獲84宗有關使用激光或彩光美容的投訴。
事隔近三星期， Carol右小腿的紅腫明顯減退，但仍可見許多條結焦的疤痕，小腿更不時又疼又癢，「唔敢着短裙，但着長褲又會整到傷口，瞓又瞓唔好，成日痛醒！」令她最氣憤的是就算知道已報警投訴，美容中心仍擺出一副愛理不理態度，「擺明蝦我小市民唔敢搞大件事，佢打開門做生意，咁落去遲早有其他受害人，我隨時準備同佢打官司」。

記者到美容中心尋找負責人 Coco，查詢彩光脫毛燒傷一事，惟多次致電查詢仍未獲回覆。